غير مصنف

ابتهال محمد : طموحها احتراف التصميم الداخلي ابرز الرسامين السودانيين

تبدع في رسم البورتريه، تطمح دائما في ان تكون الأفضل في مجال التصميم الداخلي، ابتهال ضمن أبرز الرسامين السودانيين بل العالميين.

هذه مقالة المبدعة ابتهال محمد !

ابتهال محمد سليمان ، ابرز الرسامين السودانيين

اسمي ابتهال محمد سليمان خريحه جامعة بحري كلية علوم الحاسوب قسم تقنية المعلومات .

حكايتي بدت مع الرسم من انا صغيرة كنت برسم كرتون بجانب الرسومات المدرسية وقفت رسم فترة مايعادل ثمان سنوات لظروف خاصة بعدها رجعت للرسم بسبب كلمة اتقالت لي.

انتي بتقدري ترسمي زيهم واحسن كمان .. اختي هي الفتحت عيني من جديد وفعلا بدت معاي ومشيت جبت الادوات المحتاجه ليها.

هذه الكلمة اعطتني دافع معنوي ودخلت قروب هواة الرسم السودانين ورسوماتهم كانت محفز قوي إني أرجع وأرسم من تاني.

لوحة ابتهال محمد سليمان، ابرز الرسامين السودانيين

بديت بالرسم الجرافيتي وبعدها لقيت نفسي في رسم البورترية أكتر وشاركت في معرضين بعد الفترة دي خلصت دراسة بس ما إتجهت في مجالي الدراسي إتجهت لمجال التصميم الداخلي (Interior design ) وباذن الله مكملة رسم .

رسوماتي كانت عادية في البدايه وإتحسنت بسبب الممارسة، بعدها إشتغلت جداريات كشغل خاص في عدد من الأماكن.

وكمان شاركت في عدد من الأنشطة الإجتماعية منها مع مبادرة يلانينيهو كانت جداريه في عنبر الأطفال ومشاركة مع مبادرة جدراية في أعمال فلكلور.

أما من أبرز رسوماتي من نوع البورترية!

بحب مجال (Interior design) وشايفة مستقبلي هنا وباذن الله يكون لي إسمي في المجال دا وفي مجال الفن عموماً .

حابه أقول للناس ما تسيبو شي يأثر عليكم مهما كان صعب وعلى قراركم في المجال البتحبو عشان ماتجي بعد كم سنة وتلقى الناس فاتتك بمشوار.

مجالك البتحبو كمل فية بتلقى كمية بقللو منك ومن شغلك بس إتعداهم وإي نقد ما بناء أرمي وأسمع كلام نفسك لان هو الصوت الوحيد الصح وربنا يوفقنا كلنا.

لما كنت صغيره كانت بدايه عاديه برسومات كرتون وتلوين رسومات ورسومات مدرسيه .

أما البداية الحقيقة كانت بعد ما إتقطعت فترة طويل من الرسم بديت برسم الجرافيتي وإتجهت لرسم البورترية وبعدها إشتغلت جداريات .

التحديات والإحباط لم توقفني

جدارية، ابتهال محمد سليمان ، ابرز الرسامين السودانيين

وأجهت كمية من التحديات والإحباط في البداية معظمها تحديات نفسية كلمة ” ما بتقدري وصعب عليك ” إتقالت لي كتير وفي تحديات جسدية انا مصابة بالربو (أزمة).

كنت بتضايق من الألوان والبوهية البشتغل بيها الحمدلله قدرت إتجاوزت كل دا بفضل ربنا وثقتي في نفسي وبسبب الناس الدعمتي .

اول دعم أتقدم لي من اختي هي الشجعتني إن ارجع للرسم وصفت لي قروب هواة الرسم السودانين شوفت رسوماتهم إتحمست شديد وبديت رسم .

بعدها زميلي في الجامعة شافني وانا برسم بقى مهتم برسمي أصر علي إني أنزل رسمي والناس تشوفه.

الخطوة دي كنت خايفة منها بس إتشجعت وعملتها وكانت أول مشاركه عملت أكتر من ألف لايك!

ابرز لوحات وأعمال ابتهال محمد سليمان

صراحه ما كنت متوقعة العدد دا كانت دفعة قوية جدا . تاني من شخصيه ناشطة اجتماعياً إتقدم لي أول دفتر رسم.

وأخيراً وليس أخراً كل الرفقة الحولي العرفتهم عن طريق كافة مجال الرسم خاصة والفن بصورة عامة والناس البتحب الفن كل فئة ليها تأثير كبير جدا في مسيرتي.

الكلمة ليها تأثير!

نقطة مهمة الناس تنتبة ليها الدعم النفسي مهم جدا لي اي مجال والكلمة الطيبة هينه لينه علي قائلها وسامعها “كلمة بحياة”.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى