غير مصنف

احمد عريج: طبيب وشاعر وروائي وفنان ابرز الرسامين السودانيين

استطاع الفنان جمع اكثر من هواية ومهارة يجمعها بنفس الوقت الحب والشغف، واختزلها في الرسم لتعبر عن جميع مجالات اهتماماته.. أحمد يسعى ليكون ضمن أبرز الرسامين السودانيين.

هذه مقالة المبدع احمد عريج

احمد عريج، ابرز الرسامين السودانيين

نتعرف على قصته وأعماله

اسمي احمد بدر الدين احمد عريج، عمري 23 و بدرس في كلية الطب ، جامعة البطانة، المستوى التالت، دايما بوقع بي، A3 وبترمز : (A=Ahmad 3= 3rag)

قصتي مع الفنون بدت بالرسم اتعرفت في الجامعة بي اني متعدد المواهب ، رسم شعر و رواية . لكن الحكاية الغريبة عارفنها شنو؟ انا ما كنت مخطط لي اني امسك اكتر من حاجة، لكن اوريكم لقيت نفسي كيف ماسك في الثلاثة ديل.

بديت بالرسم من رابعة اساس متذكرين الزول الفي قزازة 7 up داك ، يلا شفت لي واحد كتب رقم 7 كبير و ختا نقطتين و خشم و 4 شختات من فوق نظام شعر و كدا.

احمد عريج

و انا كطفل عمرو زي 10 سنة اندهشتا جدا و جربت الحكاية و عجبتني و بديت ارسم، متذكر اول رسمة طويلة اخدت مني ساعتين و كنت رسمتا كابتن ماجد.

كنت مجنون جن بي اسبيستون حتى اني عملت لي مانغا صغيرة و انا في سنة خامسة او سادسة ( طبعا ما احترافية )، و بديت في الانمي و عبرتا فيهو و دخلت مجال البورتريت و كان مستواي كويس بالنسبة لي عمري.

و فجاء سمعت عن حكاية انو الرسم حرام ( الحكاية دي كانت في تانية ثانوي ) ،متذكر اني رسمتا الموناليزا و كانت عاجباني شديد و لمن سمعت بي حرمة الرسم اتلفتها و قربتا ابكي عليها .
و وقفت الرسم .

عدم الرسم خلا جواي فراغ كنت بملاهو بالشعر ، بالاستماع ما بالكتابة طبعا . و ما كنت مفكر اكتب نهائي، لكن في يوم لقيت صاحبي ( شاعر ) بكتب قصيدة فانتقدتو ، و قال لي انت ما شاعر ما تتكلم.

بدأت الكتابة والتأليف

احمد عريج

لحدي اولى جامعة ، كان مستواي متواضع في الشعر لحدي السمستر التالت مع تحديات الحياة شعري و بعد القصص و الاحباطات الخلفت وراها اكتئاب عميق جعلت شعري يتحسن شديد.

ووصلت انو يتم الاعتراف بي من شعرا كبار زي زحزحة و المظلي و فؤاد المحنبي اليمني و صالح علي صالح و د. كفاح الغصين الفسطينية و غيرهم .

و كان الشعر اضافة جميلة في حياتي ، و حتى انو كل الناس بعرفوني بي احمد الشاعر ما احمد الرسام .

مع مواصلتي في الشعر اتعمقت في موضوع فتوى تحريم الرسم و اكتشفت انو ( حسب فهمي البسيط ما حرام ) و رجعت ليهو .

بس بعد وقفة طويلة كان صعب ارجع لي مستواي و بعد تدريب لي مدة قريب سنتين ، ( طبعا السنتين كانت ايام القراية و صعب ارسم ايام القراية ) فما كان في تطور كبير .

عودة بعد الحظر

احمد عريج

بس بعد ٤ شهور مع الحظر دا رجعت لي مستواي و فتو و اتعلمتا الرسم بالحبر و الديجيتال، قدرت استفيد من فترة الحظر في مجال الرسم و الشعر و حتى المجال الاكاديمي و اتطورت شديد كل البتحتاج ليهو الزمن و التخطيط المناسب بس .

اما الرواية ، فمما كنت طفل كان خيالي واسع جدا و كنت بكتب سينارويهات سمحة ( عندي روايتين مستواهم متواضع جدا جدا و ما بميل للرواية شديد لكن بحب السيناريوهات المتفردة ).

طموحي و احلامي مقسمة علي اتنين احلام خاصة و هي اني اكون من بين انجح الأطباء اولا ، و اكون بين الرسامين العالميين في الرسم الواقعي زايد عندي رواية داير احولها لي مانغا وحلمي يتعمل ليها انمي.

و اكون من بين اكبر الشعرا العندهم بصمة في البلد، اما الاحلام العامة، بحلم بي سودان يكون في الاختلاف هو الشي الطبيعي و يكون فيهو عدد البجرو ورا احلامهم و شغفهم اكبر من عدد البجروا ورا لقمة العيش.

التحديات

احمد عريج

يمكن اصعب التحديات الواجهتني انو الجامعة ما فيها نشاطات او اي جمعيات ثقافية فكنت بكتب و برسم لي نفسي في الغالب و لي قلة قليلة من اصحابي .

الذين دعموني في مسيرتي كل من امي و ابوي اولا ثم الاصحاب اللقيتهم طوال رحلتي سوا في الشعر او الرسم

دي كل القصة المتعلقة بالرسم و الشعر و اليوتيوب حاجة تانية كمان فما داير اتكلم عنو عشان ما يطول الكلام
و دي عدد من رسوماتي بالديجيتال والحبر .

شكرا لي متابعتكم للقصة، كنت متحمس اني احكيها و بتمنا تكون حافز لي كل زول بقول انو ما عندو موهبة او انك مستحيل تكون متفوق في اكتر من مجال .

ابرز أعمال الفنان

وانت ما رأيك في هذه اللوحات والأعمال المميزة ؟شاركنا برأيك

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى