قصص ناجحةمنوعات

الطيب فيصل : ستجد في لوحات البورتريه واقعية وإتقان لدى أبرز الرسامين السودانيين

حتما اللوحات المبهرة تحكي مجهود عظيم للوصول لهذه المراحل المتقدمة من الإبداع ، وإن كنت على وشك رؤية لوحاته توقف برهة ثم انظر بعين الواقع ، البورتريه والماندالا هما اكثر الفنون شهرة لدى ابرز الرسامين السودانيين ، في هذا المقال استمتع بروعة البورتريه الخاص بالطيب فيصل

هذه مقالة المبدع الطيب

نتعرف على قصته وأعماله

اسمي الطيب فيصل محمد الطيب
عمري 18 سنة بدرس في جامعة السودان كلية الفنون الجميلة لسه ما اتخصصت

ماشي او سالك اسلوب الرسم الواقعي تحديداً بالرصاص والفحم وجزء بسيط من اللوان الخشب ،وسلكت من قبل درب الديجيتال آرت.

طموحي في المستقبل انو تكون عندي خبرة في تصوير صور البورتريه الخاصة بي عشان اقدر اصور اي فكرة او موضوع وارسمها بدون ما اضطر اني افتش صور من النت أو مكان تاني.

وكذلك إني اتعلم الرسم الواقعي بالالوان تحديداً بالالوان الزيتية على الكانفاس بأحجام كبيرة لو ربنا سهل ، وكذلك اصل مرحلة عالية في الرسم بالفحم.

بدايتي كانت من وقت كنت طفل صغير، كنت برسم شخصيات مسلسلات اسبيستون و ام بي سي 3 رسومات كانت عفوية وبدون ما أوقف لقطة من التلفزيون من راسي كانت، وما كان عندي ورق فا كنت برسم في اي ورقة بلقاها او كتاب او كراس.

وبعد عمر ال13 بديت ارسم بالالوان المائية في ورق A5 رسومات من دفتر بتاع تلوين ورسومات تلوين ( طبيعة ، طبيعة صامتة ، نبات، حصين…. الخ).

وتاني انقطعت فترة من الرسم لحدي ما خشيت أوله ثانوي كنت برسم في الفصل وفي الكتب وكم مره رسمت شخصية ريقا( جامايكي) من راسي.

بعد خشيت تانية ثانوي كان في يوم مفتوح في المدرسة وكان استاذ الرياضة بدور على ناس بترسم فا ناس الفصل كلمهو بي، اداني ورق بوستر وبديت ارسم فيهو بأحجام مختلفة معظمها كانت صغيرة ومعظمها كانت بورتريه ما كانت عندي ادوات حتى اقلام رصاص الا استعرت من صاحبي علبة اقلام رصاص مدرجة.

وفي سنة تالته ثانوي تاني أقاموا يوم مفتوح وشاركت فيهو معظم الرسمات كانت للاعبين كورة كنت بتم الصورة في أقل من 5 ساعات كانت عفوية وتخطيط سريع وما كنت براعي لاي تفاصيل، دي كانت بدايتي.

بعد ما خلصت تالته رجعت تاني للرسم وبعديها وقفت فترة بسبب إحباط من التخطيط والنسب والفترة دي هي البديت فيها الديجيتال آرت ،وبعد فترة رجعت تاني للبورتريه بعد ما عرفت طريقة المربعات.

التحديات حالياً بالنسبة لي إني اتحدى نفسي برسم تفاصيل كتيرة وإضافات تانية بتكون في صورة البورتريه وكذلك إني ارسم في ورق اكبر من مقاس A2 واصبر على الرسمة خصوصاً مع قطوعات الكهرباء الخلت اليوم نص يوم.

الحمدلله وبتوفيق الله قدرت اواصل بي عزيمتي وما اشتغلت بموضوع الدعم والايكات والمتابعين كتير، لكن ممكن اقول اكتر ناس دعموني وكانوا بعلقوا على كل رسمة بنزلها هم ناس ما بعرفهم مصادقهم في الفيس وجزء كبير منهم لحدي الان متابعني، اما بالنسبة لناس البيت فدعمهم المادي كان أكبر والحمدلله، وفي رأي الشخصي انو الدعم المادي اهم من المعنوي.

أبرز أعمال الفنان

وأنت مارأيك في هذه اللوحات والأعمال المميزة؟ شاركنا برأيك

Heba Hassab Al-nabi

طبيبة مختبر وكاتبة محتوى ابداعي ورسامة ، ومهتمة بالبحث العلمي . 🌸💚شمعتي لا تنطفيء💚🌸

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى