مجتمع رياديمنح المواقع

تعرف على مشروع 5D Studio

احد المشاريع الحائزة على منحة المواقع

مشروع ( 5D Innovation Studio ) ، احد المشاريع الحائزة على منحة المواقع الالكترونية عبر مؤسسة بايونير والتي تقدم للمشاريع الناشئة واصحاب الافكار، وهي واحدة من ضمن اكثر من 50 موقع الكتروني تمت رعايتها ودعمها الى الان، لنتعرف معا على أصحاب المشروع وأفكارهم ورؤيتهم لمستقبل المشروع.

يمكنك زيارةموقع 5D Studio

مرحبا بك، حدثنا عنك و عن بداية مشروعك ؟

نحن مصطفى عبدالرحيم وحسام عبدالرحيم، جمعتنا كلية الهندسة جامعة السودان وعمل طوعي واهتمامنا بالمحتوى في السوشال ميديا تحديدا. الاتنين لاحظنا انو عندنا حس فني وذوق جمالي عالي ظهر في التصاميم والفعاليات الاشتغلناها مع بعض.

عرفنا انو كل واحد فينا عندو خبرات ومهارات لو اتكاملت مع بعض ممكن ناخد موهبتنا وشغفنا دا لمستوى أعلى وأكتر احترافية، يعني نكون بنعمل في الحاجات البنحبها وبنستمتع بيها وفي نفس الوقت ندخل منها قروش تخلينا مركزين معاها عشان نتطور أسرع، وفعلا جات فكرة انو نأسس شركة صغيرة ومعانا أصحابنا المبدعين البادين يا دوب.

لكن في الوقت داك كل واحد فينا سافر واشتغل في مجال الهندسة لفترة، خلال الفترة دي حسام طور نفسو اكتر في الغرافيك والتصوير والمونتاج والموشن وانا عرفت أكتر عن الإدارة والبزنس والتسويق وكنا بنتشارك تجاربنا، فقدرنا نلاحظ المشاكل في سوق الاعلان والإعلام دا عموما .. جزء مرينا بتفاصيلها بنفسنا في محاولاتنا للعمل الحر (Freelance).

وجزء اكبر حولينا من الناس العملو شركات ..أول المشاكل دي كانت انو المصممين المبتدئين ما بعرفو التكنيكس البتوفي معايير المستويات الاحترافية ولا بعرفو يستخدمو البرامج والادوات المتقدمة بالرغم من سهولة تعملها في الوقت دا اذا كان معاك مرشد صاحب خبرة.

فكانت ميزتهم انو اسعارهم بسيطة عشان كدا مواصلين بجوهم عملاء، ثانيا أكبر مشكلة دايما في الزمن ..العميل بكون مستعجل ..ومقدم الخدمة بالأخص ال (Freelance) الشغال ببراند شخصية بكون مشغول ومزحوم فإما بحدد زمن بعيد من البداية..او ما بلتزم بالزمن الحددو ، أخيرا الشركات الكبيرة البكون عندها (facilities) وموظفين، بكون عندهم جودة جيدة – نوعا ما – لكن اسعارهم غالية لانو تكاليف منصرفاتهم كتيرة.

بداية المشروع

عن الشركة

فكرنا لايجاد حلول تساعدنا فيها ال (technology) والمعرفة والخبرة الإدارية عشان نضمن ال (scalability) عن طريق الموقع الالكتروني ومنصات التواصل الاجتماعي لاستيعاب أكبر قدر ممكن من المبدعين في مجالات الإعلان والإعلام والفنون الرقمية؛ بتوفير مرشدين متمرسين ومجتمع بيساعدهم على التطور السريع وفي نفس الوقت والمنصة يساعدنا كلنا مع بعض في تقديم خدمات بترقى لطموح العملاء وأكتر، وتلقائيا حنكون بنرفع مستوى الأداء والتنافسية في جو من التعاون والسعي الجاد نحو التطوير المستمر والتوسع المدروس البتسهله المنصات والتقنيات والدوافع دي.

عرفونا بالمشروع، والخدمات التي تهدفون لتقديمها عبر الموقع الالكتروني؟

خدمات المنصة

الخدمات البنقدمها حاليا عن طريق الموقع الالكتروني والسوشال ميديا هي

  1. العلامات التجارية والهويات البصرية ( Branding &Visual Identities )
  2. التصاميم والرسومات التوضيحية لمواقع التواصل الاجتماعي ( Social Media Graphics & Infographics ).
  3. التصاميم المطبوعة ( Printed Designs ).
  4. البروفايلات، البروشورات،المجلات والكتب (Profiles , Brochures, Magazines and Books) .
  5. الفنون الرقمية والشخصيات الكرتونية (ثنائية وثلاثية الابعاد) (Digital Arts & Cartoon characters ( 2D , 3D)).
  6. واجهات المستخدم في المواقع الالكترونية والتطبيقات والأنظمة (User Interface (websites, applications, systems..) ).
  7. إنتاج الفيديوهات ( Video producing ).
  8. التصوير ( Photography ).

ما هي الصعوبات التي واجهتكم في البداية؟

أكبر التحديات الواجهتنا كانت عدم استقرار ظروف البلد، خطتنا كانت نبدا ال(launching) مع بداية شهر يناير 2020 فكانت فترة الثورة وبعدها الوضع الاقتصادي المتدهور وبالتالي قدر الوقت الكنا بنحاول نفضيه بعد الدوام او في نهايات الاسبوع بقينا ما لاقنو فاضطرينا نرجع نشتغل ببطء على ال(low profile) وفكرنا برضو نستهدف أسواق برا البلد، ومؤخرا مع الكرونا اضطرينا نوقف خدماتنا البتتطلب حركة برا البيت والمكتب زي تصوير الفعاليات وطباعة التصاميم المتنوعة واللي نسبة كبيرة من الأرباح بتجي منهم أكتر من غيرهم.

كيف ترون مشروعكم بعد سنة من الان؟

في المستقبل القريب بإذن الله ناوين نقدم فرصة عمل حساب في الموقع بيتيح لكل مقدم خدمة في مجالاتنا دي انو تجيهو طلبات مفصلة مباشرة من العملاء وبيتم عرض الأعمال المقبولة في الموقع باشرافنا ومتابعتنا، وناوين نضيف خاصية الدفع الالكتروني عن طريق الموقع برضو ، وطبعا زيادة المشتركين والطلبات بتزيد معاها معدلات أرباحنا ، فالمحتمل لقدام نخفض الرسوم والنسب للمشتركين ونقدم عروض أفضل وخدمات مبتكرة زيادة إن شاء الله.

شاكرين لترحال وكتير من نماذج مشاريع ريادة الأعمال والداعمين ليها زي مؤسسة بايونير ومجتمع الابتكار وريادة الاعمال IEC ولكل ال startups الاثبتت إمكانية نجاحها في زمن قياسي رغم المؤشرات المحبطة والواقع القاسي، بنتوقع في أقل من سنة بإذن الله نكون أكبر منصة متخصصة في ال Creative Industry في السودان بتجمع بين ألمع العقول والخبرات وبين الباحثين عن التميز والاحترافية والابداع.

اتذكروا الاسم والبصمة بالخمسة (5D Innovation Studio)

 (Distinctive, Dashing, Decent, Documenting, Design) ،ممتنين لفريقنا خلف الكواليس ولشركائنا وعملائنا الحتعرفوهم كلهم قريبا في الموقع ولكل أصدقائنا وكل زول دعمنا ، جزيتم خيرا جميعا.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى