غير مصنف

تيماء علي : الدعم من أقرب الناس لك هو محفز لدى ابرز الرسامين السودانيين

ان لم تخبر احدهم انه قادر فلا تخبره انه عاجز ! ، لطالما ارقتنا الكلمات السالبة في المحيط ولطالما اردنا تجاهلها لنمضي قدما ، هذه المقالة لتيماء علي احد ابرز الرسامين السودانيين ♡~

هذه مقالة المبدعة تيماء

نتعرف على قصتها وأعمالها

اسمي تيماء على،، لقبي فوفاTe .. عمري 22 عام، درست في جامعة العلوم والتقانة، مجالي مختلف شديد عن الموهبه اللي عندي درست تقنية معلومات.

ما كان رغبة رغبتي اني اقرا تصميم داخلي بحب الرسم من وانا صغنونه كدا دخلت المجال دا عشان اطور من نفسي ويكون مفيد لي ولي مجال الرسم حقي .

بحب رسم جدا البورتريه واكتر شيء بحبو خامة الرصاص ودا بسبب انو انا من اكتر الألوان اللي بعشقها ومدمنة فيها البلااااك.

بحب الألوان بس دايما بكون عندي خوف منها بحب اتعلم اي حاجة عن مجال الرسم واخوض التجربة جربت البورتريه وحبيتها بحب رسم الحيوانات خصوصا النمر ما عارفه ليه بس بيدخل قلبي وبيأخدو دائما.

اول رسمة ملونه كانت لي رسمة نمر دخلت فيها احلى تحدي بيني وبين نفسي ووصلت لي نتيجة جميلة جداً،، اشتغلت ب الوان اكريليك وحبيتها كنت ما بستقبل اي طلب خاص ب الوان الاكريليك عشان ماحصل جربتها بس اول ما دخلت التجربه دي حرفياً قلبي شالتو معاها وكانت اول تجربه ونجحت فيها.

كمان بحب ارسم ب الوان الخشب، بحب الانمي اي نعم ما حب شديد بس بعد رسمت لوحات منه حبيتو ودخل قلبي..

يعني انا دخلت التجارب في البورتريه ولوحات الطبيعة والانمي ورسم الحيوانات بالإضافة عليها و واول مره في حياتي جربت رسم 3D وان شاء الله كمان وكمان لسه في رسم ماجربتو وحأجربو ان شاء الله يا رب بإذن الله تعالى.

أبرز لوحاتي عندي رسمة كانت طلبية لي زول جد هي امو واي شي بس حرفياً اشتغلتها ب حب شديد

ابرز لوحاتي واول تجربة في البورتريه واول بداية كانت رسمة للممثلة السورية منى زاهد صح ولا غلطانه في الاسم المهم هي اشتهرت في مسلسل باب الحارة ب ام جوزيف من احلى رسماتي..

وعمل ل الممثلة نيهان كمان من أجمل اعمالي رسمتي لي احلى كبلز من اهلي حرفياً دي كانت اول مره اجرب دمج اتنين في واحد ونجحت فيها.

ومن أجمل الرسمات برضو وتجربة تانيه في الدمج وطلبية اني اجمع اتنين أصحاب وجد زابطين وربنا يديم الصحبة ف اللهم مثل هذه الصحبة..

ومن أبرز أعمالي كمان عمل ل الإعلامي أيمن عزام ب طلب من احلى بنوته الطلبية جات من تركيا.. برضو من أبرز الاعمال رسماتي لي هاري..

طموحاتي عالية جدا وربنا يقدرني وأصل ليها وأكون احلى رسامة في السودان وبلدي يفتخر بي شغفي كلو اني احقق احلامي واكون قدر التحدي

كانت البدايات في الاول صعبه جدا كنت موقفه الرسم بسبب الدراسة من الأساس ما رجعت ارسم الا لمن دخلت تالته ثانوي ف رجع الحب والشغف ليه من اول.

بس خاب ظني وتاني رجعت لي عدم الرسم ما كنت مركزة معاه شديد وكان كل همي قرايتي وكنت مضغوطه مع الجامعه مرات لمن احب دفتري يكون مرتب بتاع المحاضرات عشان افصل بين كل محاضرة برسم وبقسم الورق ف كنت اي مادة بعرفها ب رسمة كانت الرسمة بتكون حلوه وقريبه لي قلبي على حسب المادة،والاستاذ طبعاً..

من الحاجات الحلوة المرت بي طرفة لازلت اتزكرها.. كان في استاذ بكرهو شديد والمادة حقتو كانت صعبه ف رسمت رسمة حرفياً طلعت بتعبر عن الحاجة دي بس الدفتر ضاع او ماعارفه هو وين 😂…

بعديها جات المظاهرات وقعدنا في البيت وما معروف ح ننزل بتين جامعه ف بقى الزهج متحكم فيني ولمن كنت بشوف الناس بتموت كان قلبي بوجعني والله ف من كتر ما كنت موجوعه عليهم رسمت رسمة لي البشير وكانت ب رصاص ولون احمر واكيد اللون الاحمر بعبر عن دم الشهداء الرسمة في الصفحة اتمسحت من التلفون.

وبعديها نزلنا الجامعة وبعديها جات الكورونا وال 2020 وكانت اكتر سنه بتوجع والله حصل لي فيها ظروف وما كانت حلوه ابدا وجد وصلت لي مرحلة اني فقدت الشغف في الحياة ما بس الرسم ايام يا ريت ماتتنعاد كانت امتحان صعب جدا وانا قد الامتحان.

حرفياً كانت ماحلوه السنه خسرت حاجات كتيره بس العوض كان جميل ف اني رجعت للرسم واتعلمت من الفيديوهات واول رسمة بتعبر عن الكورونا كانت ودي تاني رسمة..اول رسمة في زمن الكورونا الأولى.

التحديات كانت كتيره وصعبة وكنت بضعف وابكي من غير ما حد يعرف بس كنت بقوم واعيد الرسمات وبرضو اكبر تحدي واجهني اني ارسم نفسي كان صعب والله لانو نفسك عشان ما تطلع فيها اي غلط محتاج جهد كبير وتركيز عالي ولغاية هسي ما خلصت من رسم نفسي

ما لقيت زول يدعمني في الرسم بالعكس ما كنت بلقى زول واقف معاي وسلبيات كتيره ومن أقرب الناس لي كانو بضحكو صراحة كنت محتاجة القى دعم منهم بس مع الايام لقيت دعم من اختي وصحبتي الدعم دا وصلني لي مرحله اني اعبر واواصل الإجتهاد اكتر واكتر وبالجد كنت بلقى كلام جميل من الناس لمن تاخد مني طلباتها وده كان بخليني مبسوطه ف جد انا سعيده اني اشتغلت ليهم

كلمة أخيرة…
اقول ليكم انو ياداب بعتبر دا مشوار البداية حقي ولسه بحلم في اني اصل ل مراحل بعيدة شديد..
ويا ريت القى الدعم منكم عشان ما لقيتوا من الناس اللي كان نفسي القاهو منهم..

تحياتي..

أبرز أعمال الفنانة

وأنت ما رأيك في هذه اللوحات الرائعة والاعمال المميزة؟ شاركنا برأيك

Heba Hassab Al-nabi

طبيبة مختبر وكاتبة محتوى ابداعي ورسامة ، ومهتمة بالبحث العلمي . 🌸💚شمعتي لا تنطفيء💚🌸

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى