قصص رياديةمجتمع ريادي

حوار: تأثير أزمة الكورنا على المشاريع الناشئة بالسودان

حوار مع أربعة تجارب لشركات ناشئة في السودان

ترتب على تفشي فيروس كورونا المستجد (كوفيد – 19) العديد من الآثار السلبية على المجتمعات بشكل عام، وعلى فئات وأفراد بعينها، من إرتفاع كبير في أعداد المصابين والوفيات، وكساد اقتصادي ضخم، وركود في حركة البيع والشراء.

أدى الوباء إلي قلب حياة العالم رأسا على عقب، وإنهيار في الأسواق المالية ليواجه النمو الإقتصادي أكبر أزمة له منذ عام 2008، وبحسب دراسة جديدة بالاسكوا سيقع 8.3 ملايين شخص إضافي تحت خط الفقر في المنطقة العربية نتيجة لإنتشار كوفيد19 المستجد
مما يؤكد إنها ليست أزمة صحية فقط، بل أزمة إقتصادية أيضًا.

أما هنا في السودان فقد أثرت بشكل واضح عل رواد الأعمال؛ حيث منهم من توقف وآخرون قلت إنتاجيتهم بنسب عالية.

قمنا بعمل حوار مع رواد أعمال ليحدثونا عن مدى تأثير فيروس كورنا المستجد عليهم:

حوار مع م. آية حسن، مؤسس منصة سواح الإلكترونية”

منصة إلكترونية (تطبيق هاتف – موقع إلكتروني) تقدر من خلالها تتعرف علي كل الأماكن السياحية في السودان، كما يمكنك حجز رحلة سياحية متكاملة من خلال الموقع (ترحيل – إقامة- وجبات).

نتعرف عليك اكثر؟

آية حسن محمد زين، خريجة تصميم إيضاحي بجامعة أمدرمان الأهلية ريادية أعمال ومؤسسة سواح لترويج السياحة في السودان وشريك مؤسس لمشاريع أخرى.

كيف أثرت أزمة الكورنا علي المشروع؟

في مجال السياحة التأثير كلي بحيث توقف نشاطنا ومشروعنا بنسبة 100٪.

ماهو التطور المتوقع بعد وقبل الكورنا؟

الكورونا أثرت في نفوس الناس بصورة سلبية جدًا، بعد الكورونا الترويح عن النفس مطلب مهم دي النقطة اللي شغالين عليها حاليا؛ إنه بعد زوال الكورونا بإذن الله ننزل رحل يوغا وإسترخاء وتخييم في أماكن السياحة الطبيعية ترجع المود الطبيعي للناس.

حوار مع م. محمد طه “مؤسس بير تاون”

نشأت بيبر تاون سنه 2019، الفكره جات من إنو كنا بنعاني شديد عشان نلقى الكتب الورقية الدايرين نقراها. بنبحث كتيير من مكتبه لمكتبه وما بنلقها. فقلنا لي ما نعمل تطبيق يجمع المكتبات دي كلها في مكان واحد بحيث أي زول داير كتاب يبحث عنو في التطبيق ويصلو لحدي عندو من هنا جات الفكره.

عرفنا بنفسك والفريق؟

أنا محمد طه محمد علي خريج جامعه السودان، خريج كليه الهندسه قسم هندسه الطيران 2016، مساعد تدريس جامعي سابق، مؤسس متجر المخترعين ومؤسس بير تاون مع شركاء وهما البراء وعماد.

حدثنا اكثر بير تاون؟

يستطيع الزول عبر التطبيق الاشتراك في المجلات المحليه والعربيه، وطلب أي كتاب يريد، إضافه الى امكانيةبيع كتب مستعملة عبره، بدأنا بنهايه 2019، شهر 10. هدفنا في بيبرتاون إن يستطيع أي شخص الحصول على كتاب او مرجع بأقل تكلفه وأسرع زمن.

تساهم بيبر تاون في دائما في تشجيع القراءة، في أكتوبر 2019 تم اختيارنا من ضمن 600
Startsup  للبرنامج orange corners ، في الدفعه التانيه، وكان من أجمل البرامج الإستفدنا منها كتيير.

كيف تأثر المشروع بكورنا؟

الازمة أثرت فينا شديد لأنو أكتر حاجه مهمه هي التوصيل و نحن كنا بنجمع الكتب من المكتبات لي المكتب حقنا بعديها ناس التوصيل بيوصلوها فحاليًا موقفين عشان ما نعرض نفسنا للخطر ولا ناس التوصيل.

أفكاركم شنو عشان تحلو المشكلة دي وتتطلعوا من الأزمة؟

في أفكار بندرس فيها عشان كيف نشتغل في ظل الأزمة دي زي فكره إنو نجمع الطلبيات حقت الأسبوع وننفذها في يوم واحد يكون في يوم واحد بنجي فيو المكتب عشان نقلل خطر الإصابه.

التطور المتوقع بعد الكورنا؟

صراحه كرونا علمتنا حاجات كتييره، بعديها حنعدل النظام حقنا إنو كلو يكون مربوط مع ناس التوصيل هم البيكونو بيستلمو الكتب من المكتبات وهم البوصلوها.

حوار مع م. محمد عصام “مؤسس منصة حرفة”

حرفة هي منصة لطلب خدمات صيانة المباني والمنازل بتقدم ٣ خدمات أساسية هي الكهرباء والتبريد والتكييف والسباكة بجودة عالية وضمان على كل شغل وبسعر منافس.

عرفنا بنفسك اكثر؟

طيب انا إسمي محمد عصام الدين، إتولدت ١٩٩٧ بدرس هندسة كهربائية السودان في المستوى الأخير.

مدى تأثير الكورنا عليه وما المتوقع بعدها؟

نحنا زينا زي أي زول خايف على نفسو وأهلو بس نحنا م شغالين عشان نفسنا نحنا بنساعد فئة عمال اليوميه انو يلقو شغل نحنا شغالين على اضعف فئة في المجتمع الممكن تتأثر بي كرونا. بنساعدهم انهم يلقو طلبات قريبه من بيوتهم يشتغلوها عشان يلقو حاجتهم البتكفيهم، غير إننا بنسهل على الناس انو م يطلعوا يفتشوا حرفي ، بنصل ليهم لي باب البيت.

نسبة الطلبات زادت من بداية الازمة و دا حصل بسبب انو الناس بدت تفتش حلول تقلل بيها طلعت البيت غير إنو التوعيه الشغالنها في الصفحة ومتوقعين إنو النسبة تزيد حتى بعد الازمة تخلص.

حوار مع م. سعاد حمد “مؤسسة ايسدور”

عرفينا بنفسك، وبالفريق؟

أنا سعاد حمد خريجة جامعة السودان كلية الهندسة قسم هندسة البلاستيك، نحن 5 افراد فكرتنا انو نعمل مشروع التخرج حاجه عملية وتكون كشغل بعد التخرج وقد كان، إتخرجنا 2017 وبعدها قدمنا لحاضنة أعمال مشاريع. وإتقابلنا نحن 16 مشروع من أصل 100 مشروع متقدم
ال5 أفراد هم ريم أحمد وياسر البشير ومحمد ذنذوني ومحمد نورين، نحن كان كل الخلفيه بتاعنا عبارة عن هندسة ما عندنا علاقه بالبزنس في وقتها.

حديثنا عن ايسدور؟

فكرة بتاعة ايسدور بدأت كمشروع تخرج 2017، وهي عبارة عن طباعة ثلاثية الابعاد ، بحيث نطبع الاكسسوارات والمعدات الطبية او الهندسية، في حانة رائد اخذنا كل التسهيلات الممكنة في البزنس وقدرنا نحصل على معرفة جيدة بالبزنس للمشروع، بحيث انه مجالنا هندسة .

ماهو مدى تأثير الكورنا علي المشروع؟

في ايسدور نحن بنستورد المادة الخام والاسبيرات من الصين، وبسبب الازمة دي بقينا في خطر، وشغالين على المواد المخزنه وممكن تقطع في أي وقت، وفي نفس الوقت حالياً نحن شغالين في حلول لجهاز التنفس بمحاولة طباعة اجزاءه.

ماهو التطوير المتوقع بعد وقبل الكورنا؟

قبل الكورونا دخولنا في مجالات جديدة وهي المجالات الطبية وتقديم تصاميم فريدة للمساعدة في مجابهة الأزمة، و إنو قدرنا نكتشف دورنا الممكن نقوم بيهو في الوضع دا والمسؤولية المجتمعية الممكن نقدمها بتتمثل في شنو، وحالياً شغالين بتنسيق مع عدد من المبادرات الخاصة بمكافحة الكورونا في تطوير وتنفيذ نماذج لوسائل مكافحة وحماية للفيروس.

Hyaserhimet

هياسر همت ، طالبة مختبرات طبية، مدرب معتمد من مركز غانغ، المتخصص لتدريب المدربين، مهتمة بمجال ريادة الأعمال، شريك مؤسس لي موقع بنوتة، و مهتمة باللغات.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق