غير مصنف

ساره الساير : أبرز الرسامين السودانيين ستبهرك لوحاتهم

في سلسلة ابرز الرسامين السودانيين نود تسليط الضوء على ابرز الفنانين الرسامين السودانيين الذين يستحقون الدعم والانتقال إلى العالمية والاحتراف.

الشباب السوداني والمبدعين من كتاب ومثقفين وفنانين او حتى من نركز عليهم من الرسامين السودانيين يستحقون ان ترى أعمالهم، لذا في هذه السلسلة تعتبر صفحة أو مقالة كل منهم متجددة ومحدثة بأعمالهم وكيف يمكننا دعمهم معنويا وماديا او الوصول إليهم في وسائل التواصل الاجتماعي.

هذه مقالة المبدعة ساره!

ساره الساير ضمن ابرز الرسامين السودانيين

في سلسلة الرسامين السودانيين نتعرف على ساره؟ وكيف بدأت؟

انا ساره عيسى الساير خريجه هندسة معمار جامعه السودان للعلوم والتكنلوجيا وهاوية للرسم. مشواري مع الرسم بدا من وانا صغيره كنت بشوف الشخصيات الكرتونيه وبحاول اقلدها وشغلي فيها كان كويس نوعا ما.

أولى لوحات ساره.. بداية جيدة نوعاً ما.. أليس كذلك؟

بتذكر مره واحنا صغار مشينا معرض الزهور كان في مجموعه اطفال كدا برسمو ف شاركت معاهم ورسمتي اتقيمت من ضمن افضل 5 رسومات.

فبقيت احاول ارسم ف الاجازات من فتره ل فتره لحدي م دخلت الثانوي كان عندنا ماده الفنون وصراحه كنت مبهوره بشغل الاستاذه البدرسنا.

فقررت لما امتحن ح اشيل فنون وادخل كلية الفنون الجميله بس شآت الاقدار ودرست هندسة معمار صح م مشيت بعيد عن المجال ، بس انا كان رغبتي اكتر ف كليه الفنون.

مرحلة الجامعة.. وبداية انضمامي لمجتمع الرسامين السودانيين

دخلت الجامعة وانشغلت مع ضغوطات الجامعة والرسم الهندسي لحدي م اتخرجت لقيت انو انا نسيت الرسم عديل. طبعا الرسم بيتنسي لما تسيبو فتره طويله ف رجعت ارسم ف 2018 شهر 7 بديت برسم شخصيات اسبيستون صح ف البدايه شغلي كان سي شديد.

رسومات سارة الساير في الانمي

بس كان جواي شغف كبير انو اواصل ودي اول رسمة رسمتها وشوية شوية بقيت انزل شغلي ع صفحتي فيسبوك ف لقيت ناس كتيره داعماني الحمدلله وواصلت ومستواي اتصلح جدا لحدي م شاركت ف اول معرض.

وهو معرض استيج شاركت ف قسم رسم الانميشين وصراحه لاقيت هناك رسامين بمختلف انواع الرسم وشغلهم حفزني جدا ف لقيت روحي بميل لشغل البورتريه.

احمد الشقيري عبر ساره الساير

فبعد المعرض انتهى لقيت روحي عندي طاقة وشغف عالي انو حاتعلم اتعلم وفعلا بديت اول رسمة ف ديسمبر 2019 بعد خلصتها لقيت كمية تعليقات منها المضحك ومنها الفيها دعم ومنها المحبط.

ورغم كل التعليقات دي الا انو قررت برضو اواصل فبقيت افتش قنوات تعليمة ف اليوتيوب لقيت قناه ل رسام مصري اسمو ابراهيم اسامة بقيت أشاهد فيديهاته واطبق والحمدلله لقيت انو مستواي ماشي يتحسن.

التطوير المستمر يصنع الفارق!

وساعدني اكتر توجيهات الرسامين اللي عندي فبقيت ف كل مره اتفادى اي خطأ وقعت فيو واعالجه. فحابه اقول لكل شخص عاوز يطور نفسو انو م يتقاضى اخطاو بالعكس يواجه غلطو ويحاول يصلحو ف الحمدلله كل مره لقيت مستواي ماشي يتحسن وحاليا وصلت مرحله مرضية نوعا ما.

حابه اقول لكل حد عندو موهبة عموما وخاصة موهبة الرسم انو يحاول بخصص وقت لنفسو صح مشاغل الحياه كتيره بس دي الحاجة اللي احنا بنتنفس بيها غيركم كتار محتاجين ولو ربعها حاول اشتغل ع نفسك.

وطورها واكيد ربنا حيساعدك طالما ف شغف واصرار ف انت قادر تحقق اي شي انت بتطمح ليو كتار بسمعهم بقولوا انو م لاقين زول يدعمنا.

لوحات ساره الساير ضمن ابرز الرسامين السودانيين!

انت أكبر داعم لنفسك!

وبالفعل دعم الناس ليو اثر كبير بس انت ليه م تدعم نفسك بنفسك ان شاءالله ربنا طالما زرع فيك رغبه ل شي معين ف انت اكيد قدره.

حابه اشكر كل زول دعمني ف يوم وكل زول وجهني للطريق الصاح و بطمح ان شاءالله اعمل معرض خاص بي. واطور نفسي اكتر صح ما وصلت للمرحلة العاوزاها بس راضية تمام الرضا عن نفسي حاليا.

لوحة لساره الساير

أدعم ساره لتستمرفي الإبداع.. ستصل محبتكم ودعمكم لساره بشكل مباشر!

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى