غير مصنف

ساره الطيب : اكتسبت موهبتي من أبي ابرز الرسامين السودانيين

بدأت اكتساب موهبتها منذ الطفولة فوالدها (رحمه الله) فنان تشكيلي، وكانت تلك الحقيقة داعماً كبيراً ومحفزا لها لتبدع وتواصل وتسعى لتكون ضمن ابرز الرسامين السودانيين.

هذه مقالة المبدعة ساره الطيب

ساره الطيب إبراهيم، ابرز الرسامين السودانيين

نتعرف على قصتها وأعمالها

اسمي سارة الطيب ابراهيم عمري ٢٢سنه، بدرس صيدله جامعة افريقيا العالمية السنة الأخيرة، درست الاساس في مدرسه هيرمان.

اما الثانوي في ثلاثة مدارس مدرسة حلويات سعد النموزجيه الفيها كان في حصص الفنون الجميلة الدعمتني جدا بعديها مدرسة الفتح بعدها مدرسة الفرقان الثانوية.

جربت انواع عديدة من الخامات في الرسم وبرسم الانمي للبورتريه والوان الاكريلك للرقمي وغيرو لكن حاليا شغاله في الاكريلك رسم الطبيعه وكل مرة بتعلق بنوع جديد من الفنون والخامات المختلفة.

طموحي كبير

ساره الطيب إبراهيم

طموحي والله نفسي احترف الرسم انا بعشق الرسم بكل تفاصيله ونفسي اصل لمستوى كبير فيهو ،وكمان حابه انقل الرسم من مجرد هوايه لي لأنها تكون مصدر دخلي.

وزي ما قالوا الزول ببدع في الحاجه البحبها اشتغل مع مصممين كبار شركات ديكور وكده ،وبتمنى اعمل معرض كمان.

بداياتي كانت من زمان شديد من وانا صغيرة ابوي كان فنان تشكيلي كبير واكتسبت الموهبه دي منه الحمدلله واشتغلت عليها.

ساره الطيب إبراهيم

ابوي طبعا كان القدوة في الحاجه دي ولكن شاءت الأقدار وانتقل الى جوار ربه ربنا يرحمه ويغفر له ويسكنه فسيح الجنات مع الصديقين والشهداء وحسن أولئك رفيقا.

كان نفسي يكون فخور بالمرحلة الا انا وصلت ليها دي ،بعديها ياهو في المدرسه وكده حصص الفنون كانت عندنا استاذة اسمها مي.

هي التي حفزتني وجعلتني استمر في الرسم وبس بعدها اشتغلت على نفسي والحمد لله على كل شيء.

التحديات

ساره الطيب إبراهيم

من اكبر التحديات التي واجهتني كانت البدايات في اي نوع رسم الصعوبات في ضبط النسب الصعوبات في دمج الالوان و الرسم بالاصبع في الرقمي وكده وكمان المواد واسعارها وكده يعني.

لكن بنحاول نجمعها (نجازفها) بالعندنا وحبه حبه الأمور بتمشي، وبرضو الزمن يعني مع ضغط الجامعة الواحد ما بقدر يعمل حاجه إلا في الإجازات.

اكتر داعم لي هو نفسي أولا ثم ناس البيت والأهل ماقصروا واستاذة مي بتاعت الفنون الجميله.

كلمة اخيرة

ان الزول لو حاسي في نفسو الموهبة ما يتجاهلها مهما قالوا ليهو الناس او مهما كانت الصعوبات البتواجه ، استمر وعافر وان شاء الله حتبقى حاجة كويسة.

ابرز أعمال الفنانة ساره الطيب

وانت ما رأيك في هذه اللوحات والأعمال المميزة ؟ شاركنا برأيك.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى