غير مصنف

غيداء أحمد : لوحاتها تنبض بالحياة ابرز الرسامين السودانيين

هل يمكن للفن ان ينبض بالحياة؟ هذا ما حققته غيداء ليكون حقيقة وواقع فتلك الإبداعات تتنفس معنا وتنبض بالحياة!

الفن هو رسالة بالنسبة لها، والانتقادات هي نصائح ثمينة جداً تدلها على مكامن القصور لتصيب المرة التالية! غيداء وبعمر مبكر وضعت اسمها ضمن ابرز الرسامين السودانيين!

هذه مقالة المبدعة غيداء!

غيداء أحمد ، ابرز الرسامين السودانيين

نتعرف على قصة غيداء وكيف بدأت ؟

أنا غيداء أحمد عيسى، العمر 21 سنة، بدرس طب ولسا في منتصف المشوار، بدايتي مع الرسم كانت في عمر الست سنين وكان رسمي عبارة عن شخبطة زي أي مبتدئ.

دايما كان معاي كراس وقلم وبحب ارسم أي شي قدامي (تلفزيون، شجرة، بيت.. الخ) مع اني ما كنت بعرف بس بحب اشخبط.

لوحة غيداء أحمد ،ابرز الرسامين السودانيين

بعمر 10 سنين بديت بالانيمي والكرتون، كنت بعيد الرسمة مرتين او اكتر بحدي م احس اني قربت للصورة الاصلية، كنت في كل مره بحاول اتفادى الاخطاء.

لمن صار عمري 15 سنة صراحة م يأست ولسا كان عندي امل اني رسمي حيتحسن اكتر.دايما لمن اكون فاصيه بمسك القلب وبرسم شخصيات خيالية او شخصيات محببة لي او اي حاجة.

كيف طورت من نفسي؟

لوحة غيداء أحمد ، ابرز الرسامين السودانيين

بالرسم المستمر، وكان عندي شغف وحب التقدم، دائما كنت بطمح لاني اصل لمرحلة بعيدة جدا في الرسم وأكون بيوم إحدى الشخصيات الملهمة للمبتدئين.

بتاريخ يوليو 2015 أنشأت حساب على الانستجرام ونشرت اول رسمة بتاريخ بعدها بعشر أيام، والحمد لله كنت بتقبل جميع الانتقادات لانها مهما حطمتني ممكن انها تكون لي دافع اني ارسم احسن منها المرة الجاية.

واستمريت ارسم وانشر وبدخل في تحديات مع نفسي، كنت بختار صور صعبة أو اشياء م كنت بتقنها بتعمد ارسمها واتحدى نفسي واحاول انجز.

لوحة غيداء أحمد ، ابرز الرسامين السودانيين

حتى لو ما طلعت بالشكل المطلوب في مجرد المحاولة كان بيفيدني في انو يتغير مستواي في الرسم.

الحمد لله بعد فترة فتحت حسابات على جميع مواقع التواصل الاجتماعي بنفس الاسم وحاليآ عندي في الانستاجرام اكتر من 8ألف متابع وفي الفيسبوك حوالي ألفين متابع.

وبحمدالله بديت مشروع خاص فيني ارسم وابيع لوحات رسم ودايما بلاقي تعليقات لطيفة من الناس بتخليني استمر.

اكبر مشكلة كانت بتواجهني؟

لوحة غيداء أحمد ، ابرز الرسامين

زمان لمن بديت ارسم ما كان عندي ادوات رسم بس م كنت بخلي الحاجه دي تبقى لي عائق وتمنعني من الرسم، لا بالعكس.

بقلم رصاص واحد كانت برسم اما بالنسبة للكراسات فامي وابوي ربنا يديهم العافية كانو بجيبوها لي من غير ما اطلب، كانو ملاحظين اني بحب الالوان والشخبطة.

بعد حسيت اني اتحسنت شوية في الرسم حتى اشتريت ادوات بعدها.

حالياً بالوقت الحالي رسم اللوحات الكبيرة وبالوان مختلفة تعتبر بالنسبة لي تحدي كبير حتى انها بتاخد وقت وجهد كبير مني، لاني اعتدت ارسم في دفاتر وكراسات صغيرة.

المجالات وانواع الفنون الببرع فيها؟

لمن بديت الرسم بديت ارسم بقلم رصاص، حتى ما كنت بعرف التظليل او غيرو بس مع الوقت عرفت اي شي بخصوص اقلام الرصاص، بعدها بديت بالوان الخشب، واكريليك، والالوان المائية.

وكل واحد فيهم كان صعب بالنسبة لي بس مافي اخلى من انك تتحدى نفسك وتجرب. مافي مشكلة لو طلعت م حلوة الرسمة لاني متاكدة اني حقدر اصلح خطأي.

اتوسعت في مجال الفنون وكنت بحب اجرب اي حاجة، اتعلمت النحت على الخشب والرسم عليو كمان، بصمم اشكال بالجبص، برسم على الزجاج، وكنت بحب الاشغال اليدوية جدآ ودايما. كنت بحب اكتشف.

انا ببرع في شنو؟

اتعلمت الخياطة بي جميع الغرز، المختلفة واتعلمت النسيج، فحب التجربة شيء عظيم جدا وبخليك تكتشف نفسك اكتر واكتر .

طموحي وهدفي؟

انا بتمنى بيوم اني اكون رسامة فعلآ. حاليا ما بدعو نفسي اني فنانة جدا لاني بتمنى اني اكون اكبر من كدا، لسا بتعلم ولسا مستمرة في التحديات وان شاء الله حصل للمستوى الانا عايزاو.

وان شاء الله حواصل عشان اشوف لوحاتي في اكبر المعارض واسمي يكون معروف.

نصيحة للفنانين الجدد!

لوحة غيداء أحمد ، ابرز الرسامين

بيقولو العترة بتصلح المشية، ومهما كان رسمك سيء أنا رسمي كان اسوء، ومع ذلك ما وقفت أبدا إلا بالعكس كنت بنتظر التعليقات السلبية تجيني عشان اعرف وين كان الخلل.

خلي هدفك قدامك وحاول تصل للمرحلة الانت/ي عايزها، مافي انسان اتولد متعلم، كلنا بدينا من الصفر وواصلنا، حتى لو لاقتك كمية انتقادات وتعليقات سلبية واصل برضو وخليها تكون دافع في انو تتحسن/ي، انت/ي بتقدر/ي.

وقالو انو الرسم موهبة!؟

وحتى لو كان هواية بالعزيمة والإصرار حتصنع فرق شاسع بيدك، وبتمنى ليكم التوفيق والتقدم من كل قلبي.

لوحات غيداء أحمد من الأرشيف

وانت هل استمتعت بقصة ولوحات غيداء ؟ شاركني بالتعليق بالأسفل!

مقالات ذات صلة

‫5 تعليقات

  1. ربنا يوفقك أكتر لقدام حبيبة ونشوفك أبرع فنانة في السودان إن شاء الله 💙💙💙💙💙💙💙💙💙💙💙💙💙💙💙💙💙🔥

    1. ماشاءالله تبارك الله غيدووووش تتألق 😍 عقبال نشوف لوحاتك مع لوحات ليوناردو دافنشي وتنافسيو وتبقي أحسن منو ياااااااااااا رب 🤲🤲🤲
      ❤❤❤❤❤❤

  2. غيداء يعني بس م شاء الله وان شاء الله دااايماا مبدعه اكتر واكتررر😭💜💜💜💜💜💜💜💜💜💜💜💜💜💜💜💜💜💜💜💜💜

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى