مال و أعمال

قصة يلا نبدأ بزنس

مهند تاج الاصفياء قسم الله. مؤسس شركة الوتد الهندسية ، المالكة لمعارض Wstore ، مؤسس مركز “يلا نبدأ بيزنس”

كلمنا عن “يلا نبدا بزنس” وكيف جات الفكرة؟

الفكرة بدت بي بوستات عادية كنت بكتبها في صفحتي الشخصية تحت هاشتاق #كلام_بيزنس.. علي مدار عام ونصف تقريباً كنت بحاول فيها أشجع الشباب إنهم يعملو بيزنسهمً الخاص مستصحب خبرتي البسيطة وتجربتي اللي أساسها السوق السوداني حيثُ إنو انا شغال في مجال تجارة الأجهزة الكهربائية وبعديها دخلت في مجال المنتجات الجلدية ومحاولات خجولة في تصدير أرجل دجاج للصين او خلينا نقول كنت بحاول أشتغل دايمآ علي ال blue oceans.. وبديت اقدم solutions لي شركات ولي أفراد بي شكل مستقل.

لحدي ما اتواصل معاي مركز future capacity building في بحري وعملنا ورشة كان اسمها وقتها تعال نبدأ بيزنس.. وسبحان الله.. اتعرفت فيها علي مجموعة من الشباب قدرت تساعدني في تطوير الورشة دي لحدي ما عملنا النسخة التانية اللي اخدت اسم يللا نبدأ بيزنس وكانت نقلة نوعية لأنو اختلافنا بيتمثل في إننا بنعكس واقع السوق السوداني عموماً وبنحاول نوريك كيف تصمد وكيف تدخل في السوق ال rough والمتغير شديد دا .

بعديها انتقلنا لي مرحلة تانية إننا ننشئ كيان جديد او مركز متكامل يتبنى أفكارنا واللي هو الكائن في تقاطع مكة مع عبيد ختم مقابل لي مركز مقلة للعيون وبدينا نكون منهجنا ونطبق رؤيتنا الخاصة.

“رسالتي..أريد مجتمعاً عاملاً نشطاً مرتفعاً عزيزاً يملك قوته وقراره! ” مهند .

حدثنا عن المشاكل التي واجهتك في “يلا نبدأ بزنس” وكيف قدرت تتخطاها؟

المشاكل الرئيسية كانت في إنو كيف نقنع الناس او الشريحة المستهدفة واللي هي بالنسبة لينا في البداية هي كل زول مهتم بالبيزنس او العمل الحر إنهم يكسرو حاجز الخوف وإنهم يفهمو إنو البيزنس ما بس رأس مال.

البيزنس know how.. ف عشان نتغلب علي الحاجة دي عملنا صفحة يللا نبدأ بيزنس واستخدمنا لغة بسيطة شديد وعملية لأنو نحن كنا محتاجين لي وسيلة تواصل وقياس في نفس الوقت وكانت الصفحة دي هي ملاذنا الآمن وحقيقة بقت وسيلتنا الرئيسية للوصول للهدف دا .

كيف صنعت فريق العمل؟

بي أمانة نظراً لل risk المصاحب للتجربة دي كان لازم استخدم تقنيات ال Lean startup فكان لازم ادخل دخول ناعم فبديت بي العمل مع فردين هما كانو بي لغة السوق جواكر يعني بيشتغلو او بنشتغل بالأحرى كل شي بدون job description واضح بس مثلاً كان في منتصر واللي هو فنان شديد في شغل التصميم وهو اللي كان بيصمم كل حاجات الصفحة واللي صمم حتى اللوغو والهوية.

باقي الحاجات كلها كانت smart partnership كنا بنقدم خدمة قصاد خدمة لي كل الناس لاتعاملنا معاهم.. لحدي ما وصلنا حالياً لي إنو بقى عندنا فريق مكون من 6 أشخاص ومدير تنفيذي ومهام واضحة شديد.

ما هي منهجيتك في التسويق؟

منهجيتي كانت الاختلاف او الخروج عن المألوف يعني كنا حريصين إننا نقدم محتوى مختلف وبسيط وممتع.. واشتغلنا علي إبراز نقاط قوتنا المتمثلة في معرفتنا العملية في السوق السوداني ودا كان ظاهر من خلال البوستات البنعملا.. بعدين من خلال برنامجنا القديم العملناهو

زمان وكملنا عليهو ومعطم الناس عرفونا من خلاله اللي هو برنامج #يللا_نبدأ_بيزنس واللي حصل حالياً النسخة السادسة والسابعة ح تكون في شهر اتنين الجاي واللي بيجمع أصحاب الأفكار بي ناس مهتمين بي ناس عندهم خبرة وبيوري الناس ديل كيف يبدو يصممو full business plan وفي الغالب بتتكون شراكات ومجتمع قوي من الحاجة دي .

ما هي خططك المستقبلية في تتطوير يلا نبدأ بزنس ؟

خطتنا الجاية بالجد إننا مفروض نبدأ ندخل مع مشاريع وافكار جديدة بي full support بي طريقة إننا نكون معاهم في نفس الخندق.. وبدينا نكمل الحلقة الكاملة حالياً بي توفر المساحة والخبرات والوسائل المتنوعة بتاعة الماركتن والميديا والقانونيين اللي ممكن يصيغو شكل الشراكة المحتلمة دي.. عشان نحاول نطلع مشاريع قوية و يكون عندها تأثير واضح.. فدا أهم هدف بالنسبة لينا في المستقبل.

كذلك ح نبدأ في عمل ورش جماهيرية ذات ثقل نوعي ومبسطة لأبسط متلقي ، وبنطمح كمان من خلال شراكتنا مع مجتمع Pioneer إنو نقدم حاجة بتجمع بين المنهج العلمي والعملي مع بعض.. حاجة بتشبه سوقنا السوداني.. حاجة بتشبهنا ..

برأيك، ما هي اهم جوانب نجاح الاعمال الناشئة؟

أهم جانب بالنسبة لي بالجد هي خلق فرص عمل.. إيجاد حلول لي مشاكل المجتمع المختلفة.. ومن ثم ممكن يكون السعي لي تسهيل الحياة او تحسين مستوى المعيشة.

كم عدد المتدربين الذين تم تدريبهم منذ تأسيس المركز؟ والعدد المستهدف في 2020؟

حتى الآن اتخطينا حاجز ال 70 متدرب ونحن لا نزال في البدايات بس نحن بنهتم بالنوعية اكتر من الكمية، كمان انطلاقنا الرسمي والفعلي كان في شهر 10 الماضي الصفحة تم انشائها قبل كدا في منتصف أغسطس عشان تساعد في التعريف بينا لما نبدأ.

والحمد لله.. عدينا المرحلة دي بي نجاح.. مستهدفين 250 متدرب خلال 2020 ك حد أقصى عشان نجود ونتمنى إننا نطلع بي 10 – 15 مشاريع كبيرة لحدي نهاية العام.

نصيحة او رسالة أخيرة للشباب ورواد الاعمال؟

نصيحتي للشباب بسيطة شديد.. أتعلموا اشتغلو مع بعض.. واتعلمو كيف تتكتلو وتتحدو.

بايونير

بايونير هي مؤسسة رائدة في التمكين وريادة الأعمال تهدف لبناء المجتمع الأكثر تأثيرآ في الوطن العربي والعالم..

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى