غير مصنف

منار محمد: طموحي أفتح مرسم ومشغل تياب ضمن أبرز الرسامين السودانيين

“حقيقي انا بحب اكتر حاجه رسم الماندالا والطبيعه وبالأخص الماندالا بتعجبني التفاصيل الفنيه والنقوش الكتيره والدقيقه ” المبدعة منار محمد ضمن أبرز الرسامين السودانيين

هذه مقالة المبدعة منار محمد

السلام عليكم ورحمة الله وبركاته
كيفكم يا مبدعين 💗

انا اسمي منار محمد أحمد من الخرطوم، عمري ٢٠ سنه، بدرس في كليه الهندسه قسم الهندسه المدنيه جامعه سنار خلصت المستوى الاول.

هواياتي الرسم والأشغال اليدويه قبل فتره كمان كنت بديت اتعلم شغل الكروشية من أمي 💗، بسسس لقيتو متعب فبطلت.

بالنسبه للرسم ممكن تقولو انو انا اتولدت في اُسره محاطه بي الفن والإبداع، لمن جات كورونا قررت انو استفيد من فتره الحظر وانمي موهبتي.

وفعلا استفدت منها شديد لانو كان عندي حماس ما طبيعي يعني عدد ساعات الرسم اكتر كتيررر من ساعات النوم ف ده خلى مستواي اتحسن بي سرعه والحمد لله .

من فتره الحظر ولحدي هسي انجزت انجازات كتيره منها اشتغلت على خامات مختلفه زي الورق والقماش (الكانفس) والجدار والخشب وكمان اتعلمت انواع مختلفه زي البورتريه والانمي والطبيعه والماندلا …الخ.

طبعا كل زول فينا بيجذبو نوع رسم معين، حقيقي انا بحب اكتر حاجه رسم الماندالا والطبيعه وبالأخص الماندالا بتعجبني التفاصيل الفنيه والنقوش الكتيره والدقيقه 💗.

طموحاتي ان شاء الله لي قدام كبيره زي ما كل واحد فينا بحلم انو يتخرج ويسافر ويشتغل ويشتري عربيه انا حلمي لي قدام افتح لي مرسم ومشغل تياب ان شاء الله 💗.

اما بالنسبه للدعم انا لقيت الدعم من ناس كتار منهم ناس البيت والاهل والاصحاب وناس ما كان عندي بيهم إرتباط مُسبق قبل كده لقيت منهم الدعم والإشادة 💗.

نصيحتي لي كل فنان ومبدع او زول عندو هدف معين في حياتو عايز يصل ليهو وكل زول عندو الرغبه يتعلم الرسم .

مافي حاجه صعبه وكلنا مع المحاوله بننجح لازم تحاولو مره ومرتين وتلاته عشان تصلو لي هدفكم 💗.

اخيرا الشكر موصول لي كل زول قدم لي الدعم ولي زملائي الرسامين ولي قروب الرسيم السوداني لي اتاحه هذه المساحه، مع خالص الود والتقدير💗.

أبرز أعمال الفنانة

وأنت مارأيك في هذه الأعمال الرائعه واللوحات الخلابه؟ شاركنا برأيك!

Heba Hassab Al-nabi

طبيبة مختبر وكاتبة محتوى ابداعي ورسامة ، ومهتمة بالبحث العلمي . 🌸💚شمعتي لا تنطفيء💚🌸

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى