قصص ريادية

قصة بلاك كرافت

مؤمن احمد عباس درس هندسة جلود  جامعة السودان سنة 2014 شغوف بمجال الدراسة جدآ اصراره اوصله لان يعملم في نفس مجال الدراسة.

حدثنا عن بلاك كرافت ؟

بلاك كرافت عبارة عن مشروع منتجات جلدية بمواصفات عالمية ساعيين نرسخ العلامة التجارية السودانية للعالم اجمع.

مجال الدراسة وجامعة السودان ممكن نقول دي بداية التجربة ؟  

لا، الجامعة بعيدة  عن مجال التصنيع والدراسة التطبيقية الا ان بداية التصنيع كان  ايام الجامعة .

اول منتج  لي بلاك كرافت كان عبارة عن شنو؟

 أول منتج كان عبارة عن شنطة لي شخصي، حقيقة نالت إعجاب الناس كلها  الحاجة دي شجعتني وخلتني أواصل وأنتج واعمل للشباب شنط .

“هدفنا انو نبقى ماركة عالمية ونغزو العالم بي منتجاتنا السودانية” مؤمن.

هل بداية العمل كانت ربحية  ؟

بداية العمل ما كانت ربحية، كان الناس بدفعو حق الجلد بس والشغل علي والحاجة دي خلتني اتدرب واكسب خبرة اكتر  في سنة خامسة ومشروع التخرج كنت مصر أني اشتغل مشروع فيهو عملي وفعلا عملت لي مشروع فيهو عملي كان عبارة عن جزمة كورة ( كدارة ) خفيفة نفس وزن البلاستيكية تقريبا ومضادة للموية عشان لو صبت مطرة ما تمتص الموية وتبقي تقيلة وحققت نجاح .

حدثنا ما بين فترة التخرج والبداية الفعليه لمشروع بلاك كرافت ؟

بعد التخريج بي إسبوع  قررتا اخلي البيت عشان اقدر أشق طريقي وابدا بداية فعلية واعتمد على نفسي وفعلا شلت شنطتي ورحلت وعندي 35 جنيه في جيبي اشتغلت نقاشة (بوهية وبوماستك) طلعت منها بي 700 جنيه دي كانت بداية شغلي  في الجلود اشتريت بيها قطعة جلد وادوات شغل.

ما هو التطور الحدث في المشروع  ؟

التطور ممكن يكون من نواحي كتيرة كجودة الشغل  والافكار  ومن موظف واحد (شخصي) الى 43 من الموظفين الشباب مقسمين في مختلف المهام (مصممين، رسامين، مبيعات، تلفون، واتس، مكالمات، وانستغرام وتويتر).

عدد فروع بلاك كرافت وهل هنالك مشاركات خارجية ؟

يوجد 3 فروع لبيع منتجات بلاك كرافت، ولدينا عدد من الدعاوي والمعارض الخارجية في عدد من الدول  وعندنا عدد من الوكلاء في  بعض الدول (الامارات السعودية واسبانيا  وبريطانيا )

هدف بلاك كرافت ونصيحة اخيرة ؟

هدفنا انو نبقى ماركة عالمية ونغزو العالم بي منتجاتنا دي ونقيم الصناعة السودانية الوطنية، ونوظف أكبر عدد من الناس عشان نستغل ثروتنا الحيوانية  استغلال ممكن عن طريقو ندخل عملة صعبة نحسن بيها في اقتصاد البلد القصة .

هل تعتبر مسيرة وتجربة بلاك كرافت جميلة؟

طبعا ما كلها جميلة كدا فيها لحظات خزلان وفقدان وخيبات وخسائر ووقعات  وبدايات من الصفر  وتعلم دروس بصورة قاسية جدا اهم مافي الموضوع اني كنت مصر اني اشتغل في مجالي وقرايتي ومهما حصل ومهما لقيت من مغريات وخيبات وفقدان امل ح أكون واقف على مشروعي دا واليوم أقدر اقول اني وصلتا لي هدفي.

بايونير

بايونير هي مؤسسة رائدة في التمكين وريادة الأعمال تهدف لبناء المجتمع الأكثر تأثيرآ في الوطن العربي والعالم..

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق